吃咖啡配大蒜头，是一句叉人的闲话，这句闲话的意思是讲，两种完全不搭界的物事哪能好摆了一道。

但是现在，真的有两样不搭界的物事搭了一道了，啥物事呢，喏，一样是咖啡，还有一样呢，是菜馒头，也就是咖啡配菜馒头。葛末是啥人搿能配的呢？讲拨侬听，搿个不是自家瞎配配的，是肯德基跟松月楼联手配出来的，也就是讲，以后侬到肯德基去，可以可乐配鸡翅薯条，也可以咖啡配菜馒头，这种中西合璧的味道，其实也不是首创了，这只“美国鸡”到了中国以后，一直在本土化，侬看现在，到肯德基吃早饭，油条配豆浆卖得好得不得了，今后，估计咖啡不光可以配菜馒头，可能还可以配糍饭、麻球搭老虎脚爪唻。

哎，侬吃咖啡的辰光，还想配点啥中国点心嗒嗒味道呢？

（看看新闻Knews记者：吴迪 王幸 张峥嵘 审核：夏进 特约撰稿：朱贞淼）